U susretu 27. kola engleske Premier lige nogometaši Njukasla iznenadili su favorizovani Mančester junajted i slavili pobjedu 1:0 .

Golom Meta Ričija sredinom drugog poluvremena "Svrake" su prekinule seriju od četiri susreta bez pobjede i dodatno pogurale Siti ka tituli.

Rafael Benitez je neočekivano ofanzivnom taktikom nadmudrio svog kolegu s druge strane Žozea Murinja koji je opet ostao bez pobjede na St Džejms Parku. Portugalac nikada nije pobijedio u Njukaslu kao trener, te ima skor od tri poraza i tri remija na ovom stadionu.

Junated je imao više od igre, posebno je bio opasan u prvom poluvremenu, ali su se ispromašivali Lingat, Marsijal i Lukaku.

Kazna je usledila u 65. minutu kada je Ričiju zicer servirao Dvajt Gajl sjajnom reakcijom u petercu Junajteda. Jedan od junaka pobjede Njukasla bio je i slovački golman Martin Dubravka, koji je debitovao na golu "Svraka".