Festival „Hercegovske aprilske pozorišne svečanosti“ počeo je jučer, a trajat će do 30. aprila, a moto 23. HAPS-a je „Pozorište i bajke“. 

Festival je otvorila predstava “Fistik ili san o suncu, mjesecu i još nekim sitnicama” Narodnog pozorišta iz Sarajeva, po tekstu Almira Imširevića u režiji Admira Glamočaka. Autori su napravili svojevrsnu posvetu Sarajevu iz nekih srećnijih vremena, a Fistik je njihov super – junak u kostimu običnog čovjeka.

U predstavi, rađenoj prema motivima drame Jurislava Korenića i Rejhana Demirdžića, glume Vedran Đekić, Aleksandar Seksan, Milan Pavlović, Slaven Vidak, Aldin Omerović, Martina Mandek, Deni Mešić, Amina Begović i Mona Muratović.

Na ovogodišnjem HAPS-u biće odigrano pet večernjih i tri dječje predstave pozorišta iz Srbije, Bosne i Hercegovine, Hrvatske i Crne Gore, uz bogat prateći program. Cijena ulaznice za večernje predstave je 5, a za dječije predstave 3 evra, a možete ih kupiti na blagajni dvorane Park.